Зоолошката градина во Скопје ја покрена кампањата за заштита на животните „Здрави и среќни животни“. Целта на акцијата е подигање на свеста кај посетителите, бидејќи многу несовесни граѓани , и покрај предупредувањата, на своја рака даваат храна на животните, која влијае штетно по нивното здравје. Во кампањата ќе се вклучат и јавни личности, кои ќе се обидат да влијаат на свеста на несовесните граѓани.
-Целта е да се спречи фрлањето храна и отпадоци во живеалиштата на животните. Нашите животни се хранат со здрава храна, редовно и по нормативи. Секое животно во Зоолошката градина има свое мени а исхраната се состои само од храна богата со витамини, минерали и протеини. Прва во улога на ЗОО неговател е пејачката Тамара Тодевска со ќеркичката Хана. Неа во наредните месеци ќе и се приклучат многу јавни личности, како спортисти, актери и пејачи, кои како Тамара ќе бидат ЗОО негователи и ќе ги предупредуваат несовесните граѓани да не фрлаат нездрава храна кај животните, вели директорот Ѓорѓи Галетановски. (В.М.)
