Сузана Милиќ, естетиката што ја носи во себе, ја пренесува на се што значи љубов, особено на софрата: со концепт, доминација на омилената боја и драгите рецепти што ги преточува во инспиративна глетка. Тоа го бележат нејзините постови со храна, а сега за време на празниците нејзината маса е магија што навистина предизвикува воздишки.
– Празничниот дух го чувствувам секој декември и трае се до средината на јануари, вели Сузе. „Магијата е посилна кога ја споделуваме, затоа овој дел од годината носи многу љубов, мечти за подобро утре и споделување со најмилите.
За мене празничниот дух започнува од моментот на украсување на елката, домот и трпезата. Вистинско задоволство ми претставува кога размислувам со што да ги изненадам моите најмили – семејството и сите оние кои ги чувствувам блиски како семејство.
Во овој период задолжително подготвувам слатка празнична маса која е спој од минатото, сегашноста и дел од нашата традиција – ванилици, линзер колачиња, гурабии, божиќни путер колачиња, бомбици, бајадера, розен коцки.
За Божиќ најчесто трпезата ја краси куглоф со марципан, јаткасти плодови и суво овошје. Јас си го негувам детскиот дух и се трудам да бидам крајно креативна.
Традиционално руска салата со лиснати кифличи; питулиците од моето детство, божиќно венче, елка од крекери, бастумот на Дедо Мраз, мезе по желба на домашните – сè во празничниот дух.
Месото најчесто го правам како класичен ручек: јунешко ќофте во доматен сос и пилешко ќофте во бешамел сос од шампињони, а вкусовите засилени со мирудии. За комплетно доживување музичкиот избор се сведува на рок музиката.
Со здравје, радост и убавини да ја дочекаме Новата година!
