По што ќе ја паметиш 2023-та година, какви убавини и предизвици ти донесе таа? И, дали сега со сменет статус, размислуваш поинаку?
– Искрено кажано, 2023 за мене беше една од подобрите години наназад и ќе ја паметам по многуте прасиња и мојот напредок во фармерството. За разлика од претходните години достигнав големи успеси што ми се можност за понатамошен успех, се разбира со многу работа и предаденост, знам дека ќе биде уште подобро. И, годинава добив бесценет подарок: парцела од мојот дедо.

Спомна дека „Моја фарма“ одлично напредува. Што тоа значи во бројки?
– Мојата фарма напредува многу добро, растат бројките на моите животни, како на пример- од многу мала бројка на живина сега имаме над 300 пилиња, кои во иднина ќе бидат кокошки што ќе носат јајца, исто така ги намноживме и препелиците, со доста голема бројка -ги имаме 300, а тие се познати по тоа што носат лековити јајца, многу значајни за исхраната на човекот. И секако, да не ги заборавиме и нашите прасиња – во моментов имаме околу 50 мали прасиња.

Што би им советувал на оние што би почнале да се занимаваат со фармерство? Станува популарно живеење во село.
-Доколку некој сака или планира да се занимава со оваа работа пред се треба да ги сака животните, а потоа да се одлучи на вакво нешто. Навистина обврските се доста големи и треба време за оваа „таканаречена“ љубов. Колку повеќе се вложуваш толку и успехот расте…За мене селото, конкретно Кадино за живот е незаменливо бидејќи има се што би посакале…Природна храна, здраво овошје и зеленчук, секогаш свежо мевце, млеко и млечни производи и пред се- спокој и мир за секој човек

Сигурно имаш планови за 2024, ќе откриеш ли дел од нив?
– Во Новата 2024 година пред се најбитно ми е здравјето, бидејки без него нема ништо. Кога човек е здрав тој има и доста нови планови, па така и јас…Планирам значајни нешта, но сум поборник на девизата : првин скокни, па кажи- оп!
Како сопственик на Моја фарма на сите им посакувам среќни празници, многу здравје и успеси на секое поле!