Родена како оптимист, секогаш полна со верба и живот, ова утро Јулија на својот ФБ- статус и го честита роденденот на ќерка и Андријана.
Роденден -да, но поинаква, трогателна честитка, затоа што го живеат најголемото премрежје, бидејќи Андријана има канцер.
Јулија не плаче, туку е полна со верба и надеж дека и ова, како и многуте болки, ќе помине. Патем, кога е болест во прашање, кај нас сеуште владеат табуа, како да се влегува во некоја забранета зона. Табуто на болеста и предрасудите на Балканот спречуваат да се стигне до вистинска информација, ама и да се подаде рака на помош.
И го честитаме на Андријана роденденот, и посакуваме победа и триумф над болеста. Ќе победи, затоа што е дете на победничка!
А за следната нејзина изложба, одсега ги резервираме местата.
Ви ја пренесуваме честитката на Јулија во целост.
„И ова утро, сонце мајкино започнува со помислата на тебе… ќе го славиме твојот ден, твојот роденден, кој ти е дар од бога. Денот кој ме потсеќа на мојот најголем подарок од Бога, кога првпат го слушнав твојот плач, кога првпат те здогледав и се одушевив од моето бебе.
Овој роденден се разликува од сите досега, зашто си ставена на големо искушение, а и ние со тебе, сонце наше. Ни престои битка за која знам дека ќе ја изодиме, за која знам дека ќе победиме, како и многу пати досега. Ти нежна, ранлива, никогаш прегласна, никогаш наметлива, во својот свет…секогаш со разбирање и трпеливост за сите, секогаш спремна да голтне, никогаш да не повреди, никогаш да каже лош збор …ти сонце мое и сега кога ги трпиш најголемите болки, велиш- ќе биде добро, ќе помине…свесна, присебна…велиш дури сега се соочив со стравот, дури сега го осеќам Божјото водство и знам дека ова е за мое најголемо добро…Ќе се спријателам со канцерот и потоа ќе се поздравиме, како најдобри пријатели и ќе продолжиме секој по својот пат…
Љубов моја, нема да пишувам фермани, жалопојки, зашто доста испативме, но да ти ветам нешто малку е…ти знаеш, јас знам и те гледам како ПОБЕДНИК.
Те сакаме со сето срце, јас и Стеф.
Вања Тодоровска
