Никола Ефтимов: Одмор што се памети
Летото најчесто асоцира на патување, одмор, безгрижност, на сини утра и автентични звуци на природата… Годинава е се поинаку, а додека привикнуваме на „новата нормалност“, можеме да патуваме со мисли, потребно е само да нурнеме меѓу спомените, и да- можеме да се сеќаваме.
Во тој контекст, еве кој одмор го издвојува Никола Ефтимов.
„Престојот во Тајланд во академската 2005/2006 година, покрај професионалниот ангажман како предавач и дизајнер, ми овозможи чести патувања и откривање на природните и културни богатства на оваа земја.
Секое патување на некој од островите или во внатрешноста на Тајланд беше уникатно доживување.
За дел од тие патешествија веќе имам пишувано, затоа за оваа пригода накратко ќе споделам за еден одмор што се случи на Ко Самет (Koh Samet). Овој остров, познат и како остров на поетите и остров со фин бел песок на плажите, имав можност да го посетам неколку пати, но првото одење таму ми остави најсилен впечаток, најверојатно затоа што бев соочен со сосема ново искуство. Со мојата колешка и пријателка професорката Алесандра Спадафора, инаку архитект од Италија, изнајмивме куќа покрај плажата.
Поради локацијата и комплексот на објекти, имавме приватен пристап до морето, а на услуга ни беа и сеанси на тајландска масажа. Времето решивме да го минуваме мирно, уживајќи во природата, традиционалната тајландска храна и медитација. Добро се сеќавам на првиот момент кога решивме да ги прошетаме плажите надвор од комплексот во кој престојувавме и подобро да запознаеме дел од островот, прегрнати скокавме од среќа поради убавината со која бевме опкружени. Ноќите, после вечерите, ги завршувавме во некој од баровите на плажа, во долги разговори или едноставно гледајќи во прекрасното ѕвездено небо и слушајќи ги брановите.
Од ова патување се вративме регенерирани и полни со енергија, подготвени за справување со сите професионални предизвици во тајландската метропола.“
7дена.мк
Коментарите се затворени