Првиот знак за успешноста на настан од меѓународни рамки се плановите за следното издание: уште отсега се знае дека третиот Slow Wine Fair ќе се случува од 25 до 27 феврури 2024, со напомена дека ќе го следи трендот на растење. Оваа година, за разлика од ланската се скокна за 50 %: беше посетен од над 10.000 гости, од кои половината беа индустриски професионалци од Италија и странство, во трите дена се промовираа вината од 21 земја, (Австрија, Аргентина, Хрватска, Бразил, Чиле, Чешка, Франција, Германија, Грција, Италија, Северна Македонија, Перу, Португалија, Шпанија, Уругвај..,), имаше 750 винарии, 4000 етикети, над 300 сертифицирани органски или биодинамични винарии, што во италијанската панорама, поради почитувањето на критериумите на Манифестот на Слоу Фуд (добро, чисто и правично вино) се третира како еден од највлијателните настани што ја обоија Болоња во боите на виното.
На годинешното, второто издание на Slow Wine Fair во Болоња- срцевина на знаење, студенти, архитектура и гурманскиот дух (неслучајно ја нарекуваат „Мрсна Болоња“) на „вински мегдан“ во дегустирањето на вината учествуваа- винољупци, ентузијасти, угостители, дистрибутери, сомелиери, професионалци, експерти во секторот, новинари, страсни љубители на божјиот пијалок… Нашата татковина во ова одбрано друштво неколкупати беше посочувана како винска дестинација од земјата на сонцето а голем интерес за македонските вина е резултат на автохтоноста на винските сорти и поволната клима. Големо „да“ за локално семејно вино со висок квалитет.
Слоу Фуд Македонија на винската сцена на „Slow Wine Fair 2023“ презентираше 12 винарии: „Ерос“,„Наумчеви“, „Мал Св. Климент“,„Клинчаров“, „Изворно“, „Јостела“,„Арабеска“,„Сарика „Иванов“,„Максимилијан“ и „Подрум Параџик“,„Цветановиќ“.
– Сите моди поминуваат, само виното останува – коментираа дегустатори кои уживаа во македонскиот павиљон. Ги интересираа приказните за виното од југот, производителите, квалитетот, што е „Станушина“, каква е земјата што раѓа виолетово грозје…
Индивидуално, ама сплотено, секој на свој начин, како амбасадори на земјата, винарите, вински, скоро витешки ги бранеа боите на Македонија. Привилегија беше да си Македонец на саемот за вино во Болоња.
Нашите винари се едногласни во сознанието дека настанот многу им помогнал да се споредат со другите, да ги одмерат „силите“, споредат вкусовите, некои од нив почнаа да размислуваат на тема- шампањ, да планираат- чекор понатаму и секако да уживаат во интеракција со дегустаторите. Патем, саемот на виното во Болоња беше првиот сериозен чекор кон винскиот туризам, промовирање на автохтоните сорти на грозје и на традиционалните и одржливите техники на производство.
„За да направиме револуција во винскиот свет, мора да започнеме од трите главни протагонисти: производителите – за да го поттикнеме растот на лозарството ориентирано кон животната средина, потоа- оние кои го продаваат виното, и оние кои го купуваат. Сe е насочено околу потрагата по автентична одржливост поткрепена со конкретни активности во нашата реалност. Овие предуслови се само појдовна точка, а патот напред е долг“- на затварањето на Саемот резимираше Џанкарло Гариљо, координатор на Коалицијата за Slow Wine.
Во сите периоди од човековата историја виното има извесен степен на култ па затоа и го нарекуваат божествен пијалок за сите времиња. Ова време несомнено ја доживува винската ренесанса насочена кон локалните производители.
Настанот се реализира со финансиска поддршка на Министерството за земјоделство, шумарство и водостопанство и Слоу Фуд Интернационал, како и со логистичка поддршка na македонската заедница во регионот Емилија-Ромања.
Валентина Вања Тодоровска
